Кулун тутар 31 күнүгэр, Аллараа Бэстээххэ, ССРС народнай артыыһа В.В.Местников аатынан култуурунай сайдыы киинигэр, култуура эйгэтигэр үлэлии-хамныы, кэрэни үксэтэ сылдьар дьахталларга анааллаах бүтүн Арассыыйатааҕы биир идэлээхтэр иһинэн өрөспүүбүлүкэтэҕи култуура үлэһиттэрин Сойууһа, бэрэссэдээтэл Анастасия Самсонова өйөбүлүнэн, Мэҥэ-Хаҥалас култууратын үлэһиттэрин боропсойууһа (бэрэссэдээтэл Эмма Павлова) тэрийиилэринэн форум буолан ааста.
Форум арыллыытыгар “Мэҥэ-Хаҥалас улууһа” МО дьокутааттарын Сэбиэтин бэрэссэдээтэлэ Иннокентий Андросов, бүтүн Арассыыйатааҕы биир идэлээхтэр иһинэн өрөспүүбүлүкэтээҕи култуура үлэһиттэрин Сойууһун бэрэссэдээтэлэ Анастасия Самсонова, Мэҥэ-Хаҥалас улууһун култуураҕа уонна духуобунай сайдыыга салалтатын начаалынньыга Анна Исакова эҕэрдэ тыларын анаатылар. Бу тэрээһиҥҥэ 70-ча делегат Мэҥэ-Хаҥалас, Уус-Алдан, Чурапчы, Амма, Таатта, Нам улуустарыттан кыттыыны ыллылар.
Форум сүрүн сыалынан — күннээҕи түбүктэн, араас хабааннаах информация кэмигэр нарын санныгар үгүһү сүгэ сылдьар , өрөбүлэ суох дьон сынньалаҥын тэрийэр түбүктээх үлэлээх дьахтар киһи, тус бэйэтигэр, доруобуйатыгар, санаатын сааһыланарыгар болҕомто ууруу буолар.
Эбиэккэ диэри көрөөччү улахан саалатыгар спикердэр олус интэриэһинэй иһитиннэриилэри оҥордулар. Ол курдук “Уопсастыбаннас — култуура уонна социальнай кыһалҕалары быһаарыыга сүрүн оруолу ылар” — Валентина Кириллина, СӨ идэлээх сойуустарын бэрэссэдээтэлин солбуйааччы, СӨ уопсастыбаннай палаататын бэрэссэдээтэлин солбуйааччы, СӨ н/х үтүөлээх үлэһитэ, “Пенсияҕа тахсыыга уларыйыылар” – Нюргуяна Егоровна Кононова, Арассыыйа социальнай фондатын отделын начаалынньыга, “Дьахтар ыарыыларын эрдэттэн сэрэтии” – Светлана Ильина, СӨ доруобуйаҕа харыстабылын туйгуна, Мэҥэ-Хаҥалас улууһун гинекологическай отделениетын сэбиэдиссэйэ, үрдүк категориялаах быраас, “Киһи дьылҕата дьиэ кэргэҥҥэ түстэнэр” Нина Слободчикова, клиничиескэй психолог, СӨ үөрэхтээһинин туйгуна, “Кэрэли” эбии үөрэхтээһин киинин төрөппүттэри кытта үлэҕэ “Ыал эйгэтэ” бырайыак ааптара, “Нам улууһун култууратын дьахталларын кытары үлэҕэ уопутуттан” – Туйаара Петрова, Нам улууһун А.Ф.Шестаков аатынан НАДь былааннааһын уонна култуурунай-маассабай тэрээһиннэри ыытыы отдел сэбиэдиссэйэ, култуура үлэһиттэрин дьахталларын кытары үлэҕэ хамыыһыйа бэрэссэдээтэлэ, “Аныгы саха ыала — төрүт олох оҥкулун тутуһан сайылыкка сайылааһын. Сайылыкка оҕону иитии” Галия Сосина, улустааҕы култуура уонна духуобунай сайдыы салалтатын ИМО салайааччыта сэргэх, умсугутуулаах иһитиннэриилэрин кэлбит дьон болҕойон иһиттилэр. Хас биирдии дьахтары долгутар элбэх боппуруостарга эппиэттэри ыллылар. Ол кэннэ хомуһунан эмтэнии дьарыгын Мария Иванова, Д.Ходулов аат. НАДь фольклорга специалиһа ыытта.
Эбиэт кэннэ хайысхаларынан арахсан практическай дьарыктар ыытылыннылар. “Дьылҕаҕын уларытыаххын сөп дуо?” клиническай психолог Нина Слободчикова, “Өй, дууһа уонна турук ситимэ – бэйэҕэр суолу арыйыы” сертификаттаах коуч, практик Анастасия Стручкова, “Олох эргиирэ” – трансформационнай оонньууну дьиэ кэргэн психолога Наталья Алексеева тэрийэн ыыттылар. Маннык дьарыктар киһи өйүн сааһыланарыгар, олоххо сыаллаах буолууга, сөптөөх хардыылары оҥорорго олус туһалааҕын бэлиэтээтилэр.
Түмүккэ “Үлэһит уонна үлэни биэрээччи сокуон хараҕынан” — Анастасия Самсонова форум делегаттарын мунаарар ыйытыктарыгар толору эппиэттэри биэрдэ. Салгыы боропсойуус үлэтин актыбыыстара бочуотунай грамотатынан бэлиэтэннилэр.
Бу күн Дьокуускай куораттан ааттаах-суоллаах профессиональнай фотограф Евгений УРААНХАЙ ыҥырыылаах ыалдьытынан буолла. Түгэни мүччү туппакка форум кыттыылаахтара биир идэлээхтэрин, доҕотторун кытары хаартыскаҕа түһэн кэрэ сэбэрэлэрин үйэтиттилэр. Ыраахтан чугастан кэлбит форум кыттыылаахтара элбэх саҥаны билэн, интэриэһинэй дьону кытары көрсөн, саҥа билсиһииттэн дуоһуйан, бука бары форум бэлиэлээх өйдөбүнньүк бэлэх тутан, илии тутуурдаах, тэрийээччилэргэ махтанан, астынан тарҕастылар.
Эмма ПАВЛОВА,
Мэҥэ-Хаҥалас улууһун култууратын үлэһиттэрин бэрэссэдээтэлэ